《UFO離奇命案》7月4日上映 有限成本無限創意 贏盡觀眾讚賞
《UFO離奇命案》有限成本無限創意 贏盡觀眾讚賞
新生代導演郭家禧李振傑出奇制勝打出血路
出品人斥資300萬力撐老Best開戲 凌文龍超享受楊偲泳直言大膽
謝票場觀眾舉手勁讚 「睇完開心感動又滿足，係近期最好睇嘅香港電影！」
由凌文龍、楊偲泳、陳湛文、林子傑、黃德斌主演，人氣劇集《大叔的愛》導演郭家禧（CK）及導演李振傑（Jack）聯合執導，備受期待的大癲黑色喜劇《UFO離奇命案》上周宣布口碑爆棚而提前於羅茲威爾事件日7月4日（星期六）上映，以荒誕幽默的拍攝風格，融合UFO都市傳說與黑色喜劇元素，深受全球各地影展肯定，先後晉身八大影展－烏甸尼遠東電影節（競賽單元）、紐約亞洲電影節（競賽單元）、西班牙維克亞洲夏季電影節（競賽單元）、金馬奇幻影展、香港亞洲電影節、新加坡華語電影節、上海國際電影節、馬來西亞國際電影節，更於其中烏甸尼遠東電影節榮獲白桑莓獎最佳首作獎 ，成為本屆唯一得獎港片。
近日票房大賣的外語片《嚇房》(Backroom)及《愛你致死不渝》(Obsession)都是新導演以低成本配搭一個空前絕後的概念，深得觀眾歡心，證明觀眾越來越著重故事本質及創意，同樣地，《UFO離奇命案》亦以300萬成本製作一部讓人意想不到的黑色喜劇，收獲大量觀眾笑聲，以昨日優先場等為例，有旺角區觀眾舉手激讚「冇諗到一部兩個景為主嘅電影可以拍得咁豐富！導演好聰明，劇本扎實，演員集體創作嘅感覺好強。睇完好開心，又感動又滿足，絕對係近期最好睇嘅香港電影！」；而另一場堅尼地城的謝票場，更有觀眾分享被電影團隊的熱誠影響入場：「最感動係感受到主創團隊嘅熱誠，出品人同導演嘅兄弟情好正能量。希望有更多香港電影可以咁樣搏一搏！我哋一定會支持！300萬拍出嚟嘅效果，性價比超高！」
而《UFO離奇命案》這個項目應運而生之前，深深吸引了一眾主演投放百分百信任，除了激罕的港式荒謊喜劇類型，另一大原因是戲裡戲外同樣感動人心的友情。一眾主演備受現實出品人黃德進（Eddie）及兩位導演的情誼所打動，希望並肩作戰成就這個得來不易的作品。
事源出品人Eddie及兩位導演CK及Jack為中學同學，三人相識近二十載，而Eddie一直有個心願，支持兩位投身電影的摯友拍自己喜歡的故事，因而促成《UFO離奇命案》這個以三百萬成本拍攝而成的電影。兩位導演以緊張又興奮的心情，迎接電影上映，導演郭家禧指：「每一位幕前幕後嘅戰友，都因為信任呢個故事而傾力相助，大家都投入咗超乎想像嘅創作熱誠。呢份福氣同責任，我銘記於心。而家最重要就係希望觀眾睇得開心啦，希望娛樂到大家啦。」；而導演李振傑直言緊張：「其實都緊張嘅，因為呢部戲都對我哋嘅人生意義好大啦。大家都知道香港電影呢幾年個市道都麻麻地，正當我哋兩位導演都冇乜嘢做，苦惱緊係咪需要轉行嘅時候，諗起我哋嘅中學同學就有一個戲言啦，就講如果有一日佢有錢嘅話，會投資我哋拍電影，一句戲言, 就係咁促成咗呢個計劃。真係估唔到喺人生一個比較低潮嘅時候，呢件事突然之間成真啦，好朋友嘅錢交咗俾我地，希望唔好令佢蝕錢，最緊張就係呢一個部份喇。」
而片中主要演員難忘兩位導演的熱情，以及對Eddie的承諾，凌文龍指：「我好想拍好呢部戲，喺呢個過程好開心，因為兩位導演佢哋好聰明，因為喺一個唔容易嘅 budget 之下，佢哋已經用咗一個最好嘅辦法，揀咗只係得兩個主景，咁已經可以喺製作上面慳到一定成本，但係佢地唔會因為景少，而影響電影質素，呢個係兩位導演、兩位編劇佢哋好聰明嘅地方。然後又知道係同我好欣賞嘅演員們一齊合作，所以成個過程我哋喺拍攝嘅時候係不斷有好多好有趣嘅集體創作。」；至於女主角楊偲泳同樣深受感動：「有朋友肯付出三百萬，無條件製作電影，係一件好幸福嘅事。我最感動嘅其中一樣係投資者Eddie將資金用喺我哋度，其實佢可以使咗佢，或者拎去買嘢，但係佢願意用喺拍一部電影，仲要係咁『離奇』嘅劇本，佢都敢去搏，我覺得係非常之大膽。」
至於首次擔綱主演的林子傑同樣對電影充滿信心，Ronald形容Eddie如白武士：「出品人Eddie同兩位導演嗰種兄弟情啊，我相信喺戲中亦係反映到出嚟㗎。即係嗰種因為有真實嘅 bonding，所以寫出嚟我都覺得我自己睇嘅時候，我都份外感動㗎。起初聽到呢件事，嘩係有白武士出手喎，即係俾錢出嚟做一件咁偉大嘅事，我都唔知幾想有好多呢啲咁嘅中學同學啊。」；而黃德斌則大嘆能夠參與演出相當幸運：「當我知道兩位導演係有一套嘅電影嘅時候，我係非常之開心，佢哋話我預你喎，咁我諗我梗係好啦！即係我參與呢一個戲，我覺得自己好幸運啦，因為我遇上一班咁熱血嘅導演同演員啦。我每日都打醒十二分精神，呢班後生仔玩得咁精彩，咁我都要更加投入多少少啦，好開心嘅。而家出咗嚟嘅效果呢，觀眾都睇得好好開心啦，見到好多觀眾都鍾意呢部戲啦，佢哋開心出嚟最緊要啦。大家見到星麈大師都係好開心！」
《UFO離奇命案》成功結合懸疑、驚慄與荒誕黑色幽默，故事講述25年前，小學生豪仔於東頭山離奇失蹤，被指遭外星人綁架，成為神秘都市傳說。25年後，一對網紅情侶為吸引流量，重返事發現場拍攝整蠱短片，豈料假戲真做釀成真命案，隨後神秘勒索短訊、外星人現身、眾人離奇失去記憶等荒誕事件接連發生，一切竟與25年前的失蹤案互相呼應，事件愈演愈失控，笑料與反轉不斷。