英皇電影《破·地獄》東華三院慈善首映禮 黃子華、許冠文、衛詩雅、朱栢康、周家怡等一眾演員齊集分享電影觸動人心之處 主題曲主唱及創作人林家謙披露電影帶來之感染力

電影《破·地獄》昨晚於尖沙咀國際廣場iSQUARE中庭舉行「東華三院慈善首映禮」，出席嘉賓包括幕前幕後團隊，當中包括導演及編劇－陳茂賢、演員－黃子華、許冠文、衛詩雅、朱栢康、周家怡、韋羅莎、梁雍婷、白只、鍾雪瑩、艾妮、劉若寶及主題曲主唱及創作人－林家謙。

電影早前先後晉身夏威夷國際電影節及香港亞洲電影節 ，觸動無數觀眾心靈，好評無遠弗屆，因此昨晚首映吸引多名圈中友好現身支持，排名不分先後包括陳國邦、陳家樂、洪卓立、楊天宇、沈震軒、李靖筠、泳兒、鄧小巧、阮雅、郭思、黎峻、朱天、洪助昇、黎展峯、黃明德、海兒、曾傲棐、VIVA (姜咏鑫、李晞彤、張鈊貽、馬思惠)、Locksmiths (大雄、阿東、Harry, Eric, Tom)、SULIS (冼彥龍、朱啟軒、范文浩、郭凌峰)、The Lemon Ones (Jero, Smile, BoBo, Jacky, Brian)。

《破·地獄》幕前幕後團隊難得齊集，更是子華跟Michael自開鏡儀式後，再度聚首為電影作公開宣傳，現場吸引過百粉絲駐足圍觀。導演及編劇陳茂賢分享作品之緣起，來自他心中的一個遺憾，他指：「疫情期間有親人離逝，相信有唔少人都會帶住呢種情緒，因此希望透過創作治愈自己同其他人。」

Michael則為看似沉重的《破·地獄》重新定義，他笑言：「我睇完劇本之後嚇死，原來呢部係世界上第一部冇笑話嘅喜劇，就算睇完之後會喊，你會覺得呢個世界靚咗，人係值得活落去，明天會更好嘅，喺呢個角度嚟講，呢個係我搵緊未來喜劇嘅路線。子華有分享佢覺得香港700萬人都要破地獄。」身旁的子華聽得津津樂道，他補充指：「我提議香港政府，過時過節除咗放煙花，就係喺維港中心破地獄，因為Michael同我地講破地獄有一個深層意思，就係溶火重生。」

提到跟Michael相隔三十多年再度合作，子華不忘分享：「對我嚟講，（許冠文）佢係Michael神，香港今日有各式各樣嘅喜劇，都係因為有許冠文開始，任何各門各派喜劇，哪怕同許冠文有幾唔同，大家都有佢嘅DNA喺入面。其實我哋應該叫佢『Michael捐血者』。」

而女主角衛詩雅仍然回味拍攝過程，Michelle表示：「非常榮幸同兩位神合作，其實喺片場同兩位神級演員唔係特別多傾計，因為劇情上有好多衝突。不過有幸見證到Michael神為求拍攝效果，冒住天氣寒冷都提出多拍幾Take，呢個經驗真係獲益良多。」

而朱栢康及周家怡則分別透露角色所面對之困難，朱栢康指：「我特別多謝服裝造型設計師君姐，佢嘅設計已經為我嘅演出塑造咗六七成。今次呢個不肖子角色其實都慘，佢係家中長子，為咗喺屋企生存，表面上好賴皮，但係又係必須。」而家怡則分享今次跟子華合作有別於以往，但興奮卻不減，她提到：「今次拍攝好開心，同子華神嘅合作一如以往『爽』，尤其今次探討比較現實嘅事情，所以好正。」

鮮有出席電影首映禮的林家謙，今次包辦《破·地獄》電影主題曲之曲詞編監，家謙於台上提到自己仍然難忘《破》片為他帶來的感染力：「我自己最感受到，好需要破地獄嘅，或者需要超渡嘅人，未必係先人，可能係在生或者係每日輪迴緊喺塵世間嘅人，呢個訊息啟發到我創作呢首歌。希望藉住呢首歌可以感染到每位輪迴塵間的觀眾，希望佢哋都可以獲得超渡。」

電影《破·地獄》早前宣布提早於11月9日正式上映，本週末起推出口碑優先場。故事講述在疫情肆虐生意蕭條的背景下，婚禮策劃師道生（黃子華 飾）被迫改行成為一名葬禮經紀人。起初因理念不合與喃嘸師傅文哥（許冠文 飾）產生許多衝突，因面對一位特殊的逝者文哥的出手相助、親歷文哥與女兒文玥（衛詩雅 飾）相處的點點滴滴，也慢慢改變着道生對職業及生活的態度。