[TAGHOBBY影評] 阿銀又嚟啦!!! 真人版電影《銀魂2: 規矩是為了被打破而存在的》

阿銀又嚟啦!!!繼上一集銀魂真人劇場版大收旺場之後,再下一城嚟個第二集,今次《銀魂2:規則是為了打破而存在》(掟は破るためにこそある)是依據真選組動亂篇改編。除咗沿用原班人馬小栗旬、菅田將暉、橋本環奈、柳樂優彌、長澤雅美、岡田將生、吉澤亮等之外,更加入大量角色,有夏菜的痴線變態女忍者猿飛菖蒲,以前剛直大男孩變成陰險的伊東鴨太郎嘅三蒲春馬,窪田正孝飾演寺門通(可惜冇出場)經理人河上萬齊,勝地涼飾演將軍(超好笑),更搵嚟堤真一飾演勁A字膊同少女控嘅真選組老頂松平片栗虎,睇星都夠皮。

故事方面編排上比上一集完整,主要都係用動漫上經典章節串連。但在第一集,笑位跟主線劇情冇乜關係,只純為搞笑,等觀眾易於投入。但今集在宣傳時已見到有將軍出場都知一定笑爆肚皮,最正係一眾演員大灑演技嚟搞笑,完全冇欺場,開場時亦都有揶揄真人嘅對白笑位,當然唔少得嘅向其他動畫作品致敬嘅搞笑位。就算到主線正經劇情嘅真選組內亂,各演員亦落足心機去演。本身真選組動亂篇嘅故事其實好值得反思的,為求目的,其實得到嘅係咪比失去嘅重要?

動作處理比上次複雜但乾淨俐落,就算飾演神樂嘅橋本環奈都變咗真係好好打咁,真係神樂上身咁。

最後,不得不讚嘅係字幕翻譯,因為銀魂本身係用好多日本本土文化嘢嚟玩gag,但如果照翻就未必睇得明,所以就轉化好多香港傳媒用開嘅名詞,連致敬玩嘅gag都用返港式翻名(以前覺得好老土,家下變咗好搞笑)。

PS:又話有動畫配唔掂叔嘅立木文彥做返唔掂叔嘅…. 唔覺眼嘅?果然同動畫角色一樣冇存在感,要睇多次先!

《銀魂2:規矩是為了被打破而存在的》

上映日期: 2018年9月27日

片長: 135 分鐘

語言: 日語

字幕: 中文及英文

導演: 福田雄一

主演: 小栗旬、菅田將暉、橋本環奈、柳樂優彌、三浦春馬、窪田正孝、吉澤亮、勝地涼、夏菜、戶塚純貴、長澤雅美、岡田將生、室剛、木村綠子、佐藤二朗、堤真一、中村勘九郎、堂本剛 

文章: TTM